श्याम रिमाल

कविता 

तमसोमा ज्योतिर्गमय

 मलाई अँध्यारोबाट उज्यालोतिर लैजाऊ

उज्यालोबाट ज्ञानतिर लैजाऊ

ज्ञानबाट जीवनतिर लैजाऊ

मैले बाल्नु छ यहाँ ज्ञानज्योति

एउटा ज्योतिले एउटा बाटो देखाउँछ

मैले बोक्नु छ उज्यालोको राँको

एउटा प्रकाशले एउटा जीवन बचाउँछ

मलाई असत्यबाट सत्यतिर लैजाऊ

सत्यबाट प्रेमतिर लैजाऊ

प्रेमबाट भ्रातृत्वतिर लैजाऊ

मैले रोज्नु छ  सत्यको बाटो

एउटा सत्यले एउटा ज्योति भर्भराउँछ

मैले पुरा गर्नु छ  सत्यको वाचा

एउटा विश्वासले पूर्ण प्रेम बर्साउँछ

मलार्इृ मृत्युबाट जीवनतिर लैजाऊ

जीवनबाट सिर्जनातिर लैजाऊ

सिर्जनाबाट सभ्यतातिर लैजाऊ

मैले ब्यूँझाउनु छ विश्वको धुकुधुकी

एउटा धुकधुकीले एउटा प्राण जोगाउँछ

मैले रच्नु छ प्राणमय संसार

एउटा प्राणले मानवसभ्यता उजिल्याउँछ ।

000