टंक वनेम

 

कविता 

बेलाको माग

बादशाहलाई घोडाबाट खसालेर
बादशाहको ढाल, तरवार
बादशाहको गोला, बारुद
अनि-
बादशाहले भिरेको बन्दुक खोस्नु पर्छ
घोडाबाट खसेको बादशाह
निरस्त्र भएन भने
बादशाहले फेरि
दुन्दुभी शङ्ख फुक्नेछ
उस्को सत्ता सारथिहरु रथ हाँकेर
युद्ध मैदानमा हाजिर हुनेछन्
उस्का अक्षौहिणीहरु
महासमरमा तम्तयार हुनेछन्
फेरि महा संग्राम हुनबाट बचाउँन
बादशाहलाई
शङ्ख फुक्न नदेऊ
बादशाहलाई
निशस्त्र पार ।


बादशाहले फेरि
टाउको उठाउँन नसकोस्
बादशाहले फेरि
जल्लादी रुप धारण नगरोस्
बादशाहले फेरि
दुनियाँ स्वास्नी मान्छेहरुको
सिन्दुर नपुछोस्
बादशाहका शिकारीहरुले
मन्दिरको प्राङ्गणमा
निर्दोष मान्छेहरुको
शिकार नगरोस्
बादशाहका भजन मण्डली र
उस्का चाटुकारहरुले
भ्रमको खेति नगरोस्
बादशाहका शकुनिहरुले
जनताको छाँतीमा
पासा नखेलोस्
जनताले खोसेर
बादशाहको दुन्दुभी शङ्ख
फुटाई दिने बेला हो यो
बादशाहलाई
बादशाह नबनाएर
असल नागरिक बनाऊ
असल नागरिकले मात्र
दुनियाँले चाहेको
एउटा असल देश
बानाउँन सक्छ ।

000