कविता
सिंहदरबार
सिंहदरबारले
फेरि निषेधित क्षेत्र घोषणा गरेर
के-के बचाउन सक्छ ?
अश्वमेध महायज्ञमा फ्याँकिएको संविधान
बादशाहको मारिएको घोडा
समयले उखेलेको
श्री ५ महाराजधिराज तानाशाहको शालिक
नारायणहिटी चिडियाखानाको लोपोन्मुख जनावर
के सिंहदरबारले बचाउन सक्छ ?
दरबार भत्काउन भूइंचालोले अब
पर्खने छैन कुनै 'आइतबार'
दरबार जलाउन आगलागीले पनि
कुर्ने छैन कुनै अग्नि दिवश
दरबार बगाउन पहिरोले समेत
प्रतिक्षा गर्ने छैन कुनै खाडीको मनसुन
भने, के सिंहदरबारले अब
कुनै दरबार बचाउन सक्छ ?
सिंहदरबारले
फेरि निषेधित क्षेत्र घोषणा गरेर
क-कसलाई मार्न सक्छ ?
आन्दोलनमा घाइते विचार
आँधीजस्तो शहीदको सपना
ज्वालामुखीसमान जन-चेतना
व्यक्तिको सार्वभौमसत्ता
नागरिकको नैर्सर्गिक स्वतन्त्रता
जनताको अधिकार
अथवा
कोतघरको ख्याक-इतिहास-
क-कसलाई मार्न सक्छ ?
लङ्का दरबार खरानी भइरहेछ
भुङ्ग्रोको चम्किलो आगो
निभ्ने छैन कुनै जुद्ध बारुण यन्त्रको विषालु पिसाबले
भने,
दुर्गन्धित टुकुचाको पानी उत्सवमा
स्वयं आगो भएर
सिंहदरबारले के आगो मार्न सक्छ ?
सिंहदरबारले
फेरि निषेधित क्षेत्र घोषणा गरेर
के-के बचाउन सक्छ ?
के-के मार्न सक्छ ?
सिंहदरबारभित्र
व्यवस्थाको सिनो अझै गनाइरहेछ
र भन्किरहेछन् रङ्गीचङ्गी झिंगाहरू
भने,
सिंहदरबारले एउटा झिंगा मार्न सक्छ ?
000
No comments:
Post a Comment